An Nuacht is Deireanaí ó Shaol na hEolaíochta

Posted on Márta 26, 2014 le

0



Ní chabhraíonn na toitíní leictreonacha leat éirí as nós an nicitín. Tháinig lucht taighde in Ollscoil California ar an gconclúid nach cuidiú iad na toitíní leictreonacha leis an duine atá ag iarraidh éirí as nós caite an tobac. Tá nicitín sna toitíní leictreonacha: an té a bhíos á n-úsáid faigheann sé a dháileog nicitín ar dhóigh nach gcuireann le priacal na hailse, ach ós é an nicitín is cúis leis an andúil tobac, ní bhaineann an toitín leictreonach a dhath den andúil sin – níl ann ach modh eile leis an bhfonn tobac a shásamh. Tá an locht céanna ar an nguma coganta nicitín.

Paindéim nua fliú ag bagairt orainn? Bhris tonn nua d’fhliú na n-éan amach sa tSín sa bhliain 2013, agus tá lucht saineolais buartha gur féidir go rachaidh an fliú seo ar fud an domhain. Tréithchineál nua d’fhliú na n-éan atá ann nár haithníodh ar na daoine ach le déanaí, agus is é an giorrúchán a sheasas don chineál seo víreas ná H7N9. Fuair breis is céad duine bás leis an víreas seo sa tSín, agus buaileadh daoine breoite leis ag dhá ócáid. Faoi láthair is iad na cearca agus na héanacha eile a iompraíos an víreas, agus ní bhíonn na daoine á tholgadh óna chéile, ach is féidir go gcuirfidh an éabhlóid – is é sin, sóchán éigin – ar a chumas an léim sin a ghearradh sa deireadh. Mar sin tá eagla ar na saineolaithe roimh eipidéim dhomhanda.

An bhfuil an t-athrú aeráide ag fabhrú do ghalar Lyme? Leis na blianta beaga anuas tá an sceartán úd Ixodes scapularis ag dul i bhfairsinge in oirthuaisceart Mheiriceá Thuaidh. Is é an sceartán seo a iompraíos an baictéar is cúis le galar Lyme, Is féidir an galar seo a leigheas le hantaibheathaigh má aithnítear sách luath é, ach is é oighear an scéil go rachaidh na chéad airíonna thart, cé go mairfidh an baictéar istigh ag déanamh dochair agus damáiste don orgánach. Mar sin is féidir leis an othar a shíleadh go bhfuair sé biseach iomlán ón ngalar cé nach mbeadh ach cneas thar goimh ann. Sa deireadh is féidir leis an ngalar díobháil thromchúiseach a dhéanamh do chóras na néaróg agus don chroí. Is féidir a aithint ar na staitisticí go bhfuil an sceartán ag éirí níos coitianta de réir is atá an aeráid ag dul i dteas, a deir Nicholas Ogden ó Údarás na Sláinte Poiblí i gCeanada.

Imthoscaí don Bheatha ar Mhars á nIonsamhlú: Tá foireann taighdeoirí sa Spáinn tar éis seomra ionsamhlaithe imshaoil a chur i dtoll le chéile atá scoite scartha ar fad ón timpeallacht agus na himthoscaí taobh istigh múnlaithe ar Mhars. Úsáidtear an seomra ionsamhlaithe le triail a bhaint as gléasra nua taighde. Is éard is cuspóir do na hiarrachtaí seo ná stáisiún meitéareolaíochta taistil a fhorbairt a bheadh oiriúnach d’imthoscaí Mharsa. Bheadh “gluaisteán” cianrialaithe ag iompar an stáisiúin seo ar dhroim Mharsa, agus é ag déanamh staidéir ar atmaisféar agus ar aimsir an phláinéid ruadheirg.

(Foinsí: http://www.sciencedaily.com agus http://www.sciencenews.org)

Posted in: Nuacht