Béal Feirste le bheith Dearg le Fearg

Posted on Márta 30, 2014 le

2



Pobal na Gaeilge ó thuaidh le léirsiú ar son a gcuid cearta

Níl amhras ar bith ach go bhfuil gluaiseacht na Gaeilge múscailte óna suan agus ag gníomhú arís ar son a gcuid cearta.10003348_10153999668135644_170845916_n

Bhí lá stairiúil ann ar an 15 Feabhra nuair a rinne 10,000 Gaeil athghabháil ar an phríomhchathair agus iad ag éileamh cearta do Phobal na Gaeilge agus na Gaeltachta.

Spreag seo muintir Chonamara chun gnímh agus tháinig 1,000 Gaeil ar na sráideanna na Gaeltachta ar an 23 Feabhra le ‘Slán le Seán’ a rá, ag tagairt don Choimisinéir Teanga, Seán Ó Cuirreáin a d’éirigh as mar gheall ar chaimiléireacht agus chur i gcéill an stát ó dheas i dtaobh na Gaeilge. Tá Gaeil ar fud an oileáin ar lorg seirbhísí cuí agus cearta do Phobal labhartha na teanga agus muintir na Gaeltachta.

Is ag leanúint ó Lá Mór na Gaeilge sa phríomhchathair, go dtáinig gníomhairí teanga ó fud fad na 6 contae agus níos faide i gcéin le chéile ag cruinniú poiblí i mBéal Feirste agus iad an aontú go raibh geárghá le feachtas logánta ó thuaidh.

Rinne na Gaeil cinneadh chun an ‘LÁ DEARG’ a eagrú ó thuaidh ar an Satharn 12 Aibreán i mBéal Feirste agus iad ag éileamh CEARTA, COTHROMAS & CÓIR do lucht na teanga.

Agus í ag labhairt thar cheann an Grúpa Oibre Feachtasaíochta, dúirt Caoimhe Ní Chatháil, a d’fhógair An Mórshiúil Feirsteach i láthair 10,000 ag an Lá Mór i mBáile Átha Cliath. ‘Chinn gníomhairí teanga sna Sé Chontae gur chóir dúinn tógáil ar an tonn fuinnimh a d’fhás ó Lá Mór Gaeilge i mBaile Átha Cliath.

Tá pobal na Gaeilge ó thuaidh ‘dearg le fearg’ sna cúinsí reatha ina bhfuil achmhainní teoranta s’againn curtha i mbaol ag ciorruithe stáit agus cearta teanga a shéanadh orainn ar bhonn córasach’.

Dhearbhaigh Comhairle na hEorpa ar an 14 Eanáir, go bhfuil ag teip ar an Fheidhmeannas roinnte cumhachta sna Sé Chontae i leith na Gaeilge de agus iad ag cur cosc ar fhás agus ar chur chun na teanga ó thuaidh. Cuireadh an spot-sholas ar dhearcadh naimhdeach cuid de bhaill Stormont i leith na teanga, agus easpa tacaíochta dá húsáid sna cúirteanna, sna meáin, i gcomharthaíocht phoiblí agus i gcúrsaí Oideachais.

‘Ar an 12 Aibreán, beidh muid ag éileamh cearta, cothromas agus cóir agus tá na Gaeil iontach tógtha fána ceisteanna seo.

Tá todhchaí roinnt grúpaí Gaeilge agus na seirbhísí a sholátharaíonn siad faoi bhagairt, le seirbhísí luathbhlianta agus réamhscolaíochta ina measc; tá cearta taistil do lucht Ghaeloideachais a shéanadh in ainneoin gur baineadh cás cuairte inár dearbhaíodh na cearta seo; níor forbraíodh soláthar iar-bhunscolaíochta ó thuaidh bíodh is go bhfuil éileamh ann di; ta Gaeltachtaí s’againn faoi ionsaí; agus diúltaíonn Rialtas na Breataine agus polaiteoirí Stormont Acht na Gaeilge a reachtú ó thuaidh.’

Lean Caoimhe ar aghaidh, ‘Creideann muid go láidir go gcaithfear an deis agus an ceart a thabhairt do na daoine a roghnaíonn an Ghaeilge í a úsáid. Beidh cruinnithe poiblí ar fud an oileáin chun tacaíocht a mhealladh don mhórshiúil seo agus tá muid ag iarraidh teachtaireacht diongbháilte, láidir a thabhairt do na hÚdaráis. Iarrann muid ar Phobail na hÉireann, áitiúla agus ar fud an oileáin seasamh linn don LÁ DEARG.

Tá fáilte roimh gach saoránach a chreideann i dtodhchaí na Gaeilge agus i  gcearta daonna i gcoitinne. Is linne ar fad an teanga ársa s’againn agus ní mór di bheith lárnach i dtodhchaí roinnte s’againn. Cuirfear fáilte roimh gach duine a labhraíonn an Ghaeilge agus gach duine ar suim leo í. Bígí linn ar an Lá Dearg i mBéal Feirste!

Na Trí Éileamh;

–         Acht Gaeilge cuimsitheach ceart-bhunaithe a achtú ó thuaidh.

–         Go gcomhlíonann an Stát ó thuaidh a ndualgas reachtúil le go bhforbrófar Córas Gaeloideachais Cuimsitheach.

–         Go gcuirfear acmhainní cuí ar fáil d’fhorbairt Phobal na Gaeilge.

Fágfaidh an mórshiúil, Cultúrlann McAdam Ó Fiach ar an Satharn 12 Aibreán ag a 2 a chlog le dul chuig Cearnóg Theach an Chustaim, i lár na Cathrach i mBéal Feirste.

Le haghaidh tuilleadh eolais, déan teagmháil le ladearg@gmail.com nó  cuir scairt ar Chaoimhe, 07500428600. Agus féach, fbl.me/ladearg & #ladearg.

Posted in: Nuacht