Curiarracht Chomhrá Gaeilge Beartaithe

Posted on Lúnasa 25, 2014 le

0



GRÚPAÍ AR FUD AN DOMHAIN Á LORG CHUN CURIARRACHT CHOMHRÁ GAEILGE A BHAINT AMACH!

 Tá Seachtain na Gaeilge ag lorg grúpaí ó gach cearn den domhan chun páirt a ghlacadh i gcuriarracht dar teidealComhrá ’14 chun an comhrá Gaeilge is faide ar domhan a bhaint amach ó 5 – 12 Deireadh Fómhair 2014.

 Déanfaidh Comhrá ‘14 iarracht an churiarracht dhomhanda don chomhrá leanúnach Gaeilge is faide ar domhan riamh a chruthú trí shraith de chiorcail chomhrá Ghaeilge a nascadh le chéile ó áiteanna ar fud na cruinne i rith na seachtaine ar leith seo.

Beidh uair a chloig cainte ag gach dream agus bainfear leas as an idirlíon chun na grúpaí Gaeilge éagsúla a cheangal le chéile, áit a shruthófar Comhrá ‘14 beo ar leathanach idirlín na curiarrachta arwww.snag.ie/comhra ar feadh an ama. Beidh deis ag an bpobal trí chéile páirt a ghlacadh ar Twitter leis an haischlib#comhra.

 Arsa Brenda Ní Ghairbhí, Bainisteoir Sheachtain na Gaeilge: “Reáchtáladh Comhrá 24/7 do Bhliain na Gaeilge 2013 agus baineadh amach curiarracht dhomhanda do chomhrá Gaeilge 168 uair a’ chloig. Is mian linn tógáil ar an gcuriarracht sin agus í a shárú le comhrá 169 uair a’ chloig i mbliana!

Chomh maith leis sin, is spreagadh iontach a bheidh ann do dhaoine agus grúpaí ar suim leo an Ghaeilge a úsáid agus ceangal a dhéanamh le grúpaí eile ar fud an domhain chun í a cheiliúradh i slí nuálach agus spraíúil.”

 Tá grúpaí á lorg ag lucht eagraithe Comhrá ’14 le freagracht a ghlacadh as uair a chloig amháin (nó níos mó), mar sin más spéis leatsa nó le do chiorcal comhrá áitiúil páirt a ghlacadh sa chomhrá leanúnach Gaeilge is faide ar domhan riamh, seol an dáta agus an tréimhse ama gur mhaith le do ghrúpa tabhairt fúithi chuig comhra@cnag.ie nó glaoigh ar oifig Sheachtain na Gaeilge ar +353 (0)1 4757401.

 Tá roinnt grúpaí tar éis uaireanta a chur in áirithe cheana féin mar sin is fiú am a chur in áirithe go luath ionas nach mbeidh díomá ar do ghrúpa. Is féidir féachaint ar chlár ama na curiarrachta ar www.snag.ie/comhra i gcomhair tuilleadh eolais faoi na tréimhsí ama atá fós ar fáil. Gheobhaidh gach grúpa rannpháirteach pacáiste tacaíochta le smaointe agus téamaí cainte chun cabhrú leo agus iad i mbun an chomhrá mhóir.

 Tá físeán ar http://youtu.be/ghaiHCszUTg a léiríonn cuid de bhuaicphointí Comhrá 24/7 agus is áis iontach í chun daoine i do phobal a spreagadh le páirt a ghlacadh sa churiarracht in 2014.

 

Táthar ag súil go mbeidh ciorcail chomhrá á n-eagrú ag leithéidí chraobhacha Chonradh na Gaeilge, choistí Gaeilge, scoileanna, eagraíochtaí cultúir, chlubanna óige, údaráis náisiúnta agus áitiúla, agus neart eile mar chuid den tograComhrá ’14. Tá gach eolas faoi Comhrá ’14 ar shuíomh Sheachtain na Gaeilge ar www.snag.ie/comhra.

Posted in: Nuacht